ကျောင်းပုံစံနောက်ခံတစ်ခု။ ဒါပေမယ့်မြန်မာနိုင်ငံက ကျောင်းတွေရဲ့ပုံစံနဲ့တော့ သိပ်မတူသလိုပဲ။ ကျောင်းလွှတ်ချိန် ကျောင်းဆင်းလာတဲ့ လူငယ်လေးတွေကတော့ အဖြူနဲ့အစိမ်းဝတ်စုံလေးတွေနဲ့။ ကျောင်းသားကျောင်းသူ အရေအတွက်ကတော့ (20) လောက်ပဲရှိပါလိမ့်မယ်။ အဲဒီအထဲက ကောင်မလေး တစ်ယောက်နောက်ကို ကျွန်တော်ပြေးလိုက်သွားမိတယ်။ စာသင်ခန်းထဲက ထွက်ထွက်ခြင်းမှာပေါ့။ သူ့ကိုကျောင်းလှေကားထိပ်မှာ မှီလာပြီး သူ့ပခုံးကို ကျွန်တော်ဖက်ပြီးဆင်းလာသလိုပဲ။ သူကတော့ သိပ်မကြိုက်သလိုပဲ။ ထူးခြားတာက ကျွန်တော်တို့နှစ်ယောက်ကို ကြည့်ပြီးပြုံးနေတဲ့၊ သဘောကျစွာကြည့်နေတဲ့ ကျောင်းသားအတော်များများဟာ ကျွန်တော့်သူငယ်ချင်းတွေဖြစ်နေမလားတော့မသိဘူး။ ဘာမှတော့သိပ် မသေချာပါဘူး။ သိပ်သေချာတဲ့အကြောင်းအရာတွေကို ကျွန်တော်မှတ်မိလာပါတယ်။ ကျောင်းတံခါးဝ ရောက်တဲ့အခါ သူ့ပခုံးကိုကျွန်တော်ဖက်ထားမိတယ်။ သူကလည်းကြည်ကြည်ဖြူဖြူပါပဲ။ ကျွန်တော့်စိတ်ထဲက အလိုလိုသိနေတာ ကဒီနေ့ဟာကျွန်တော်တို့နှစ်ယောက်ပထမဆုံး ချစ်သူဖြစ်တဲ့နေ့ပဲ ဆိုတာကိုပါ။ ကျွန်တော်သူ့ပခုံးကို ဖက်ပြီးလမ်းလျှောက်လာတဲ့အချိန်မှာ ဘာစကားမှ မပြောဖြစ်ပေမယ့် သူကတော့ သူ့အသိတွေရှေ့ရောက်ရင် သူ့ပခုံးပေါ်တင်ထားတဲ့ ကျွန်တော့လက်ကို ဆုပ်ကိုင်ထားလေရဲ့။ လျှောက်လာရင်းနဲ့ ကျွန်တော်တို့ရှေ့မှာ တံခါးတစ်ခုကိုတွေ့ရတယ်။ သူ့ကိုကျွန်တော်မေးလိုက်တယ် ။ ``ဘယ်ဘက်မှာကစားကွင်းရှိတယ်သွားမလား´´ သူက ``ဟင့်အင်း၊ ဟိုဖက်မှာဘုရားဖူးလို့ရတဲ့မျှော်စင်လေးရှိတယ်။ အဲဒီကိုသွားမယ်´´ ကျွန်တော့်စိတ်ထဲမှာ ဘာကိုစိုးရွံမိမှန်းတော့မသိဘူး။ဒါပေမယ့် သူ့အလိုကျကျွန်တော် လိုက်လျောခဲ့တယ် သွားနေရင်းသူနဲ့ကျွန်တော် ချစ်သူတို့သဘာဝ စကားလေးတွေပြောဖြစ်ခဲ့တယ်။ ``သူ့ကိုမျက်နှာအစိတ်အပိုင်းတစ်ခု ချင်းစီကြည့်တော့ ချောလည်းမချောဘူး၊ ရွံစရာကြီး´´လို့သူကရယ်ပြီး ပြောတယ်။ ကျွန်တော်ကသူ့မျက်လုံးကို လက်ဖ၀ါးနဲ့အုပ်ပြီး ``ဒါဆိုမကြည့်နဲ့ပေါ့၊ မျက်နှာတစ်ခုလုံးကို ကြည်ပေါ့´´ လို့ပြောလိုက်မိတယ်။ အဲဒီအချိန်မှာ အရမ်းသေချာသွားတယ်။ သူ့ကိုကျွန်တော့ဘ၀တစ်ခုလုံးစာအတွက် အရမ်းချစ်မိ သွားတယ်။ အစကတော့ သိပ်မသေချာသလိုပဲ၊ အခုတော့အရမ်းသေချာသွားမိတယ်။ တစ်ဘ၀လုံးစာပေါ့။ ကျွန်တော်တို့ဦးတည်ပြီးလာနေတဲ့ မျှော်စင်လေးကိုရောက်ဖို့ရာ ကျွန်တော့်တို့လမ်းဖြတ်ကူးဖို့ပဲ ကျန်တော့တယ်။ ကျွန်တော်တို့ကားလမ်းတစ်ဝက်ခန့် ဖြတ်ကူးအပြီးမှာ ယာဉ်ထိန်းရဲကားနှစ်စီး ဖြတ်မောင်းသွား တာကိုတွေ့လိုက်ရတယ်။ ကျွန်တော်တို့ကိုများဖမ်းမလားလို့ ကျွန်တော်စိုးရိမ်မိလိုက်ပါသေးတယ်။ ကျွန်တော်တို့ ကျန်ရှိနေသေးတဲ့ လမ်းတစ်ဝက်ကိုကူးနေရင်းနဲ့ -------------------- ကျွန်တော်အိပ်မက်က နိုးလာအောင်လုပ်လိုက်မိတယ်။ အိပ်မက်ကလန့်နိုးလာတာမဟုတ်ဘူးနော်။ ကျွန်တော့ရဲ့အိပ်မက်ကောင်းလေးကို အဆိုးအညံ့တွေနဲ့ အဆုံးမသတ်ချင်လို့ပါ။ ထူးတော့ထူးခြားတယ်ဗျ။ ကျွန်တော့ရဲ့တခြားအ်ိပ်မက်တွေမှာ မိန်းမလေးတွေပါလာရင် လိင်မှုဆိုင်ရာ အညစ်အထေးတွေနဲ့ပြည့်နက်လို့။ ဒီအိပ်မက်လောက်လည်း မကြာရှည်ပါဘူး။ အိပ်မက်ကနိုးခဲ့ရင်လည်း စိတ်ပျက်စရာ အညစ်အထေးတွေနဲ့ပေါ့ဗျာ။ တကယ်ကိုစိတ်ပျက်စရာပေါ့ဗျာ။ ဒီအိပ်မက်လေးမှာတော့ ဖြူစင်သန့်ရှင်းစွာ ချစ်ခင်မှုကို ကျွန်တော်နားလည်မိတယ်။ ကြည်နူးမိတယ်။ နိုးထလာတဲ့အခါမှာလည်း စိတ်ထဲ ကြည်နူးပီတိဖြစ်မိပြီး တစ်ခါမှ မခံစားဖူးတဲ့ ခံစားမှုတစ်ခုကို ရရှိလိုက်ပါတယ်။ ကျွန်တော်အိပ်မက်က နိုးတဲ့အချိန်မှာ ကျွန်တော့မှာ တာဝန်တစ်ခုရှိသွားသလိုပဲ။ ကျွန်တော့်အိပ်မက် ထဲကချစ်သူကိုပဲ အပြင်မှာလည်း ချစ်မယ်ဆိုပြီးတော့ပေါ့။ သူ့ကိုကျွန်တော် အရမ်းတွေ့ချင်တယ်ဗျာ။ သူဘယ်မှာလည်း ကျွန်တော်မသိဘူး။
Subscribe to:
Post Comments (Atom)
0 comments:
Post a Comment